Bestos Beste: Hakkasteik
Hakkasteik er tradisjonsmat frå Hardanger. Tradisjonelt vart det servert som nattmat eller frukost i bryllup og fekk difor namnet brurasteik. I dag vert hakkasteik servert både til kvardags og fest!
Ingrediensar til 6 personar:
- 500 g salta og røykt lammekjøtt/røykt svineknoke
- 500 g malt kalvekjøt/karbonadedeig
- 500 g salta og røykt flesk eller to sommarkotelettar
- 2 dl byggryn
Slik gjer du:
- Legg gryna til bløyt kvelden før du skal lage hakkasteik.
- Kok kjøttet til det løysnar fra beinet. Her kan du bruke det du har. Besto bruker gjerne kjøttdeig om ho ikke får tak i malt kalvekjøtt, eller hiver i eit “ferdigete” fenalår i for smaken si skuld. Ta vare på krafta.
- Kok gryna i bløytevatnet til dei er møyre og ha i litt av kjøttkrafta. Pass på at det ikke blir for salt!
- Bland kjøtt og gryn. Konsistensen skal vera som middels til tjukk graut.
Hakkasteik er veleigna til å frysa ned, like greit å lage mykje medan ein gjer det! Ha gjerne i ein løk når du skal varme opp hakkasteiken. Hakk då opp løken og surr den i smør i panna før du har i hakkasteiken.
Server med kokte poteter, kokte skiver av kålrabi og raudbeter, eller kanskje med raudbeter i Laurines potetkaker som vi har gjort?